عايزة أعمل مطبخ وسمعت إن فيه خامات كتيير ومحتارة أعمل أنهى خامة؟؟
الخشب أحسن ولا الخامات الجديدة؟؟
يعنى إيه أكليرك و uv و poly lak و pvc ؟؟؟
إزاى أستلم المطبخ؟؟
هل الإكسسوارات الداخلية للمطابخ زى المطبقية والتربو مهم للمطابخ؟؟
ايه الفرق بين مجر ومفصلات السوق ومفصلات ومجر بلوم؟؟
يعنى إيه مفصلة باكم؟؟
إيه أفضل شكل او طريقة لوزر علب المطبخ؟؟
بيكون فيه اسبتة قش فى المطابخ الخضار..منين اقدر اجيبها؟؟
تقريبا دى من أكثر الأسئلة الشائعة فى بند المطابخ...
هاجاوب عليها وأحفظوا معايا..ولا ادعى لنفسى الفهم دونا عن من فى مجال النجارة..فمعنا مهندسين وفنيين أفاضل نتعلم ونستفيد من خبراتهم...
اولا المطبخ بيتكون من علب علوية وعلب سفلية...خامة الدرفة هى ما يسمى المطبخ بها..يعنى هتعمل مطبخ أرو يبقى الدرف أرو..هتعمل مطبخ اكليرك يبقى الدرف أكليرك وهكذا..
المطابخ إما خشب او الخامات الجديدة الأخرى و التى قد تبدو غريبة على مسامع البعض!!
الخشب اما ماسيف يعنى خشب شجر طبيعى لم يعاد تصنيعه وإما خامات اخرى زى الفنلندى والكونتر وفى الأغلب دول للدرف الفلات وبيكونوا ملزوقين قشرة أرو...طيب الماسيف إللى هو خشب طبيعى فيه منه الأرو وفيه منه البيتش باين...الأرو أغلى من البيتش باين ولمعرفة الفرق هارفق صور فى التعليقات لكل منهما...حد يقول طيب نعمل درفة زان هاقوله آسف..
الزان من الأخشاب إللى بتتأثر بالعوامل الجوية مهما كانت درجة تجفيفه..
نيجى للخامات الأخرى مثل البولى لاك والأكليرك وال uv و ال pvc ...
الأكليرك مادة صلبة ذات ملمس زجاجى بألوان وأشكال مختلفة..لوح الأكليرك بيكون على mdf...ولما بيتم تقطيعه بيكون حرف ال mdf ظاهر فلذلك بيتم لزق شريط من نفس اللون بخامة pvc ..
البولى لاك وال uv وال pvc خامات أيضا بتكون على mdf وبيتم معاملتها معاملة الأكليرك...
الخامات دى كلها بتتميز بأشكال وألوان مختلفة منها نفس ألوان الأخشاب وقشرتها ..والألوان المسمطة السادة..والمقلم والمربعات المتداخلة...وأحيانا رسومات كما فى ال pvc....الخامات دى كلها مقاومة للماء والحشرات ...وعلشان حضرتك تفرق بينها لازم تتفرج على عينات من تلك الخامات علشان تقدر تحدد عايز تنفذ إيه فيهم.
نصيحة بالنسبة لخامة الأكليرك...بيظهر عليه أثار خدش وتجريح مع الوقت والإستخدام...
حددت الخامة وخلاص اتفقت...ايه النقاط إللى هتركز عليها فى الإتفاق؟؟
اولا التصميم...يعنى تشوف مطبخك مرسوم قدامك بتوزيع الوحدات والأجهزة الكهربائية.
ثانيا الخامة المستخدمة فى تصنيع الوحدات..أفضل الخامات على الإطلاق كونتر جوود وود مكسى فورميكا وملزوق شريط pvc ..العلب السفلية ارتفاع 90سم...و العاب العلوية 60سم واحيانا 70سم حسب الإتفاق..واحيانا فى التصميم بتكون وحدات الكورنر 80سم..
الوحدات إللى بتكون الدرفة فيها زجاج هى وحدة المطبقية إللى بتكون فوق الحوض...ووحدات الكورنر.
الوحدات إللى بتكون درفها زجاج بتكون الأرفف من الداخل زجاج.
العلب السفلية بيتعملها وزر من الرخام او الأستانلس الفضى او الاستانلس الدهبى...او بترفع على رجول استانلس بريجلاش...ريجلاش يعنى بتعلى وتوطى.
العلب العلوية بتتعلق بعليقات ايطالى بريجلاش بردو.
المجر والمفصلات بلوم...والمفصلات باكم..
طبعا فيه مجر ومفصلات صينى لكن لا تقارن ببلوم..
بلوم شركة متخصصة فى مجال الإكسسوارات..خامة وجودة ومتانة مقرها بشارع جامعة الدول العربية يمينا بعد شارع البطل أحمد عبد العزيز..
باكم ده توصيف لطريقة غلق المفصلة للدرفة بحيث إن الدرفة بتقفل ببطئ(يعنى الدرفة مابتترزعش)..
طبعا بيتم توزيع الإكسسوارات الداخلية حسب الإتفاق ودى بتكون غالبا على العميل...وكرأى شخصى أفضل الإكسسوارات الداخلية بالمطبخ (المطبقية والسلة الدوارة و الكورنر)...
اسبتة الخضار و التى تصنع من القش الطبيعى وايضا الصناعى بتتعمل على هيئة ادراج وبيتعمل حساب للتهوية...بيكون فيه ورش لتصنيع البامبو دول فى الغالب إللى بيعملوا هذا النوع من الأسبتة.
أكيد فيه حاجات سقطت منى ولكن بالنقاش ستظهر وأرجو أنكم تكونوا استفدتم من هذا المنشور.
وفق الله الجميع  :-)
..
بعض اسماء الخشب باللغة الانجليزية وترجمتها الى العربية
اسماء بعض الاخشاب باللغة الانجليزية
الخشب الزان beech wood
الخشب الارو oak wood
الخشب البلوط ash wood
الخشب العزيزى pine wood
الخشب الموسكى beech pine wood
الخشب الموجنة او الماهوجنى mahogany wood
خشب التك teak wood
خشب الورد rosewood
خشب البليسندر palisander wood
خشب الصندل sandalwood
خشب الكريز cherry wood
خشب الجوز walnut wood
خشب الابنوس ebony wood
خشب الحور او القيقب maple wood
خشب الابلاكاج plywood
 
 
يرجى تسجيل الدخول أو إنشاء حساب جديد لإضافة تعليقات